SuperDizionari

parâ fûr loc.v.

Fâ lâ o sburtâ fûr, difûr, de bande esterne e v.i.

sinonims

mandâ fûr

esemplis

"in chel a rivarin i carabinîrs che a scomençarin a parâ fûr la int dal curtîl"

gjavât fûr di "Sflamiadis" di Pieri Menis

"di cjase mê o soi paron di parâ fûr cui che o vuei, ancje cul stombli de scorie"

gjavât fûr di "Lis predicjis dal muini" di Josef Marchet

parâ fûr loc.v.

Mandâ vie di cjase o di un puest che si veve in proprietât o a fit

esemplis

""No vin plui cjase nô, nus àn parâts fûr parcè che il pai al jere cence lavôr""

gjavât fûr di "Timp di infier" di Pieri Somede dai Marcs

parâ fûr loc.v.

Mandâ vie di un puest di vore, di une funzion, di une posizion

sinonims

mandâ vie, parâ vie, butâ fûr

esemplis

"ancje tal gno piçul cjantonut di plevan o ài vudis lis mês rognis e par dôs voltis o ài riscjât di jessi parât fûr par indegnitât"

gjavât fûr di "La vere cariere" di Antoni Beline

"lis grandis ditis a stavin tacant a parâ fûr dute la manutenzion. Mecanics formâts par agns, che a cognossevin ogni bulon dal stabiliment, mandâts in pension o demansionâts, par daspò apaltâ dut fûr"

gjavât fûr di "Delit in vie del Lavoro" di Igor Londero

parâ fûr loc.v.

Fâ, completâ, rivâ insom, soredut di corse

sinonims

argagnâ, meti dongje, parâ dongje, stampanâ, stampanâ sù

esemplis

"«Tu sê lunc come la cassa di Tunissi!» a diseva la zent a cui che a nal si distrigava a parâ four li vori"

gjavât fûr di "Il Crist sclagn" di Novella Cantarutti

parâ fûr loc.v.

Frontâ e passâ une dade di timp o une situazion che e met devant di dificoltâts

sinonims

puartâ fûr

esemplis

"i borghesans, poare int, a lavin là sù nome a cirî bêçs cuant che a vevin une disgrazie in cjase o une malatie, cuant che no rivavin a parâ fûr l'Unvier cun chel che a puartavin i gjermaniûi"

gjavât fûr di "Chei di Muraie" di Pieri Menis

monolengâl